Ыйтусем
Гордеева Светлана Денисовна
Ывăнать манпа анне те,
Асатте: «Хăпсамччĕ», – тет.
Ман ыйту нумай, пурне те
Пĕр пин çуллăха çитет.
Маншăн пурте интереслĕ,
Ǎнланас килет йăлтах.
Мĕн курман, илтмен, пĕлместĕп –
Эп ыйтатăп çавăнтах.
Кайăксем мĕнле вĕçеççĕ,
Самолёт та?.. Ǎнлантар!
Кăмпана «лисичка» теççĕ,
Ма «кушак» е «кашкăр» мар?
Шăрчăк мĕншĕн çурăк саслă?
Çывăрать-и дикобраз?
Мĕншĕн-ши, кăтăкласассăн,
Çав тери кулма хавас?
«Пулă евĕр чĕмсĕр» теççĕ,
Мĕншĕн-ха «ăман пек» мар?
Сассине ăçтан илеççĕ
Сĕрме купăс калама?
Кĕтесре, диван патши пек,
Ма кушак мăр-мăр! тăватъ?
Пирĕн чӳрече мĕн-ма тек
Тăваттăмĕш хутра пулать?
Шĕшкĕ тунă сарă мăйăр,
Мĕншĕн чăрăшăн – йĕкел?
Хуравне тупмашкăн йывăр –
Илсе парăр кĕнеке.