ПИРĔН ТЕЛЕЙ
Давыдов-Анатри Василий Иванович
Пĕррехинче аннерен,
Те халиччен илтменрен:
«Телей тени мĕн тени?»—
Тесе ыйтрĕ Сăпани.
Анне ăна йĕркерен,
Мĕн пур чунтан, чĕререн,
Çурăмĕнчен лăпкаса,
Ăнлантарчĕ каласа:
«Эсĕ маттур çитĕннĕ,
Ача садне çÿрени,
Унта вăйă выляни —
Телей çавă, Сăпани.
Хапрăк-савăт ĕçлени,
Хирте тыр-пул çитĕнни,
Эпир лайăх пурăнни —
Телей çавă, Сăпани.
Шăнкăр-шăнкăр шыв юхни,
Шăнкăрч юрă шăратни,
Çĕршыв ÿсни, вăйланни —
Телей çавă, Сăпани.
Эпир сана вĕрентни,
Пире эсĕ итлени,
Маттур, лайăх вĕренни —
Телей çавă, Сăпани...»