Пĕрремĕш юр

Юр çĕр каçипех вĕçтерчĕ

Мамăк евĕр ярăнса,

Хĕл çитни çинчен систерчĕ

Парăс евĕр хупласа.

Ир-ирех кушак вăранчĕ,

Пăхрĕ те чӳречерен

Карăнса тăма вăтанчĕ

Тĕлĕнсе чун-чĕререн.

Кам капла тума пултарнă?

Тĕлĕнтермĕш! Ах тĕнче!

Тахăшĕ тăкса тултарнă

Шур хăйма кил картинче.

Чĕлхине кушак çуларĕ,

Чупса тухрĕ урама,

Сăмсине юр кăтăкларĕ –

Ĕмĕт кайрĕ харама.

Силленсе çилленнĕн пулчĕ:

Тутлă мар-мĕн, ай тур-тур!

Кӳршĕсен кушакĕ кулчĕ:

– Хăйма мар çав ку, шур юр.