Пӗчӗк пулӑшакан
Николаева Людмила Петровна
Ӗҫлеме пит юрататӑп,
Ӗҫлемесӗр чун чӑтмасть.
Пулӑшма ялан васкатӑп,
Темшӗн-ҫке пулсах каймасть.
Ӗҫлес кӑмӑлпа ак тухрӑм
Картишне асаттепе.
Мӗнпур пылчӑка эп пухрӑм -
Асанне сӑмахӗпе.
Тӑрӑшса кӗпе-йӗм ҫурӑм
Сурӑм шывӗ хӗрринче.
Йӗп-йӗпе пулчӗ ҫан-ҫурӑм,
Ҫук тип вырӑн хам ҫинче.
Пахчара йӑран ҫумларӑм,
Ҫирӗм кӑшт сухан ун чух.
Шел, нумай пулӑшаймарӑм:
Куҫҫуль юхрӗ, чӑтма ҫук.
Ҫемьепе пӗрле эп килтӗм
Хире утӑ типӗтме.
Кӗрепле ак алла илтӗм -
Шӑлӗ катӑлчӗ темме.
Ӗҫлеме пит юрататӑп,
Ӗҫлемесӗр чун чӑтмасть.
Пулӑшма ялан васкатӑп,
Темшӗн-ҫке пулсах каймасть.