КУРĂК
Полорусов-Шелеби Николай Иванович
Пĕтĕм çĕршыв илемне
Эпĕ кÿрсе пурăнап,
Симĕс пурçăн евĕрлĕ
Вутăн-хĕмĕн курăнап.
Симĕс пустав çитĕпе
Витсе тăрап эп çĕре,
Кунĕн-çĕрĕн чăр-та чар!—
Кайăк сасси ман çире.
Тĕвик-тĕвик текерлĕк,
Тăрик-тăрик тăрнисем—
Янăраса тăраççĕ
Тĕрлĕ кайăк юррисем
Хам çуратнă ача пек
Кайăксене сыхлатăп,
Ырă уçă сывлăшпа
Эп вĕсене сывлатап.
Эп пулмасан çĕр çинче
Чечексем те пулмĕччĕç
Колхозниксен нÿхрепĕсем
Сĕт-çупала тулмĕччĕç.
Колхоз выльăх-чĕрлĕхне
Тăрăс-тăрăс сиктереп,
Колхозниксен кил-йышне
Тутлă апат çитереп.