Кивĕ пушмак
Гордеева Светлана Денисовна
«Пушмаку пăтă çиесшĕн, –
Асăрхарĕ асатте. –
Кĕт, çитетĕп». – Çĕнетесшĕн
Пулĕ вăл каллех «тетте».
Кăшт кăна хăть пулăшмашкăн
Хатĕрлентĕм ваттине –
Пушмака тăрантарасшăн
Хĕрхенмерĕм пăттине.
Асатте пÿрте кĕрсессĕн
Кулса ячĕ сасăпах:
«Пушмака юсас тесессĕн
Çĕнетес урăхларах.
Çăварне те карнă вирлĕ,
Чылай чалăшнă кĕлли.
Пăтă мар, пăта çеç кирлĕ
Юсав ĕçĕсем валли».