Художник
Гордеева Светлана Денисовна
Пĕлĕт, юр, хĕвеллĕ çумăр,
Йытăпа кушак, çерçи...
Сăрăçа епле тав тумăр –
Пултаруллă Элекçи!
Шăллĕ çеç хăпма пĕлмесĕр
Сухăр евĕр çыпçăнать.
«Çил ачи пур тет, пиччемĕр,
Ӳкерсе парсам». «Юрать.
Пулĕ-ши ĕç пархатарĕ,
Çил эп ÿкерсе курман», –
Шухăша путса каларĕ
Шухă шăллĕне паян.
Çил – çунатлă, çил вĕçевлĕ,
Парăса карăнтарать.
Вăйĕ темиçе виçеллĕ,
Вăрмана авăнтарать.
Элекçи чылай шутларĕ
Унталла та кунталла:
Çилленмесĕр çил шырарĕ,
Çитрĕ, тупрĕ пулмалла.
Кулса илчĕ те маттуррăн:
«Ку ÿкерчĕк, – терĕ, – сан»
Авăнса пуç тайнă хурăн.
Çил пурах апла пулсан!