Хрисан Степанов
ТУПМАЛЛИ
Сăвăсем
Чаплă шăпа
Эпĕр хатĕр
Галстук
Поход юрри
Чекистсем
Комсомол
Парти ялавĕ
Хĕрлĕ тупалак
Çул çинче
Никамран телейлĕ
Кам пулмĕ тарават
Ленин площадĕнче
Мускав – пирĕн шанчăк
Пирĕн ял
Çулпуç йăмри
Çитрĕ çуркунне
Илемлĕ шăнкăрав
Чун туртать
Концерт
Пограничник
Сукмак
Хĕвел
Алăсем
Кам тăрĕ аякра
Елкăра
Музыкантсем
Йĕлтĕрпе
Хрисан Степанов. Пьеса
Хрисан Степанов
1 пайлă пьеса сыпăкĕ
ПЬЕСĂРИ ÇЫНСЕМ
Хрисан Степанов – пионер.
Хрисан юлташĕсем :
Силюк
Петĕр
Элекçи
Укçине
Управ Вашукĕ – кулак ачи.
Вера Григорьевна – учительница.
Ачасем, колхозниксем.
Пĕрремĕш курăну
Ял урамĕ. Ретĕн ӳсекен лапсăркка йăмрасем. Улăм витнĕ пӳртсем лăпчăнса лараççĕ. Малта чус витнĕ пӳрт çамки çине «Шкул» тесе çырса çапнă. Ун крыльцине «Пурте вĕренме! Ырă сунса кĕтетпĕр!» текен лозунгпа капăрлатнă.
Хрисан шкул крыльцинчен урамалла тухать. Хул хушшине кĕнеке-тетрадь хĕстернĕ. Пир кĕпепе, пиçиххи çыхнă. Мăйĕнче хĕрлĕ галстук. Çипуçĕ çумне кăштах улăм пĕрчисем çыпçăнни палăрать.
Xрисан
Управ пытарнă ку тырра
Тухса каяс чух ссылкăна!
Ах, пĕлтересчĕ хăвăртрах
Куна ман партячейкăна.
(Кайма тăрать.)
Вера Григорьевна урам енчен пырса тухать.
Вера Григорьевна
Хрисан Степанов, эс-çке ку! Сывлăх сунатăп эп сана!
Хрисан
Вера Григорьевна, ырă кун Сире те чĕререн сунап!
Вера Григорьевна
Аçта каян ирех капла?
Урăх никам та курăнмасть.
Xрисан
Ирех килес килет шкула.
Ман чунăм унсăр лăпланмасть.
Вера Григорьевна
Пăлханчăк темшĕн эс, Хрисан?
Çипуç йăлтах çӳп-çаплă сан.
Xрисан
(çӳпсене тасаткалать)
Кĕрсеттĕм эп шкул картишне
Управăн сарайне курма.
Каятăп халь ялканашне
Пĕр ĕç пирки канашлама.
Вера Григорьевна
Ун-кун çӳретĕн мĕн туса?
Урок, ак, пуçланать часах.
Xрисан
Эпĕ урок пуçланиччен
Унта хутлатăп темиçе.
Вера Григорьевна
Ун пек тĕллевсĕр чупиччен
Хăть тĕрĕсле килти ĕçе.
Xрисан
Тĕллевсĕр мар-ха. Пур вăл ман...
Чылай пулать унта кайман...
Вера Григорьевна
Манран эс пытаран темскер...
Пĕлтер, ара, Хрисан, пĕлтер...
Хрисан
Калам, эппин, сире ăна...
Юрать пуль комсомолкăна?
Вера Григорьевна
Кала, кала, мĕскер ара?
Тен, питĕ кирлĕ хыпарах...
Xрисан
(шăппăнрах)
Эп куртăм халь сарайĕнче...
Пур çĕр айĕнчи тĕнче...
Унта лараççĕ михĕсем.
Вера Григорьевна
Мĕнле михĕсем? Аçта вĕсем?
Xрисан
Управ пытарнă вĕсене.
Парасшăн мар Советсене.
Вера Григорьевна
Аçта ара? Пĕлтер часрах.
Xрисан
Çав картишри сарайĕнче,
Управăн пулнăскерĕнче,
Çĕре чавса, мачча сарса,
Управ хăварнă пытарса.
Вера Григорьевна
Юрать, Хрисан. Сан хыпарна
Пĕлтерĕп партячейкăна.
Эс хатĕрлен уроксене,
Пулăш кăштах ыттисене...
Килетĕп эпĕ хăвăртах.
Урок пуçланĕ вăхăтрах.
Вера Григорьевна каять. Хрисан, тенкел çине ларса, кĕнеке вулама пикенет.
Вашук сасартăк крыльцаран сиксе тухать.
Вашук
Эп илтрĕм пĕтĕмпех, Хрисан.
Ма пур çĕре чикен пуçна?
Вăл тырă ман! Илес пулсан,
Чиксе шăтарăп эп куçна.
Xрисан
Çын вăйĕпе тунă тырра
Параççĕ колхоза, паллах.
Ĕçленĕ эп те тарçăра –
Манăн тӳпе те пур пайтах.
Вашук
Ах эс, хĕрлĕ шуйттан çури!
Ларĕ пырна Управ тырри.
Çапса çуратăп ак пуçна.
Xрисан
Тивĕ хăвнах ĕнсе хыçма,
Вашук
Эс йĕкĕлтетĕн-и тата,
Çынна хисеплемен калта?
(Карта çумĕнче выртакан кирпĕч катăкне илсе Хрисана хăмсарать.)
Силюк, Элекçи, ытти ачасе м кĕреççĕ. Хăшĕ сумка йăтнă, хăшĕ кĕнеке тетрадьне хул хушшине хĕстернĕ.
Силюк
Э-эй! Вашук, пăрах чулна!
Мĕн-ма тиветĕн Хрисана?
Xрисан
Вашук, ытла
Ан хып вутла.
Элекçи
Вашук, пăрах эс хирĕçме.
Калла туртан отряд ĕçне.
Вашук
(чулне пăрахса)
Юрать! Тĕл пулăпăр кайран.
Пурпĕр тараймăн эс манран.
Элекçи
Вашук, пустуй эс ан юна.
Явап тытма тивет сана.
Сан тăрăшасчĕ вĕренме –
Пăрахăн, тен, сĕмсĕрленме.
Вашук
Шкул хамăр кил-çуртра чухне
Вĕренĕп эп кирек хăçан.
Анчах ан каçăрттăр пуçне,
«Эп çеç маттур» тесе, Хрисан.
(Каять.)
Силюк
Мĕн-ма пĕрмай вăл хирĕçет?
Пăсасшăи пирĕн пур ĕçе.
Xрисан
Эпир пĕрле чух
Пăсма парас çук.
Элекçи
Хрисан, мĕнле эс ĕлкĕрен?
Задачине те йăлт шутлан,
Сăввисене те вĕренен,
Шкула та шав çитен малтан.
Силюк
Çĕрле вăл колхозра ĕçленĕ,
Чуптарнă ирхине кунта.
Xрисан
Çук, апла мар. Çулла... тимленĕ.
Халь вĕренес пулать шкулта.
Элекçи
Çулла тухаттăмăр хаваслăн
Колхоз уйне эпир пĕрле.
Вĕретчĕ уçă çил кас-кассăн
Хастарлăха çĕкле-çĕкле.
Силюк
Юхатчĕ пирĕн юрă уççăн
Уй тăрăх Мăн Çавал енне.
Çумлаттăмăр пĕр йыш пек туслăн
Тыр хушшинчи талпиçене.
Xрисан
Çумкурăкĕ – тырпул тăшманĕ,
Унпа ялан кĕрешмелле.
Хресчен тăшманĕ – ял куштанĕ,
Ăна та йăлт пĕтермелле.
Силюк
Кĕрер пуль, ачасем, класа.
Урок, тен, пуçланать часах?
Ыттисем
Кĕрер, задача тĕрĕслер
Е сăвăсем аса илер.
(Шкула керсе каяççĕ.)
Xрисан
(пĕччен юлса)
Вера Григорьевна килет.
Ана кунтах кĕтсе илем.
Вера Григорьевна кĕрет.
Вера Григорьевна
Хрисан, пĕлтертĕм хыпарна
Эп ялканаш ĕçтăвкомне.
Пултарнă терĕç пытарма
Управ татах .та пурлăхне.
Xрисан
Апла пулсан,
Хавас чунтан.
Вера Григорьевна
Колхозниксем ăна часах
Пăхатпăр терĕçĕ чавса.
Тав, теççĕ, паттăр Хрисана.
Тăр чăнлăхшăн эс яланах! <…>