Хĕл килĕ ǎçта?
Гордеева Светлана Денисовна
– Пур хĕлĕн те килĕ, –
Пĕлтерчĕ анне. –
Юр-пăр ăна кирлĕ
Витме керменне.
Çут кĕмĕл илет те
Тĕрлет кантăка,
Парнеллĕ килет те
Шаккать алăка.
– Анне, çав тĕрленĕ
Хитре чечексем –
Сив хĕл парнеленĕ
Эрешлĕ илем.
Нимле Хĕл Мучи те
Кĕмест çын патне.
Сухал çыпăçтарчĕ
Тин çеç асатте.
Çĕн çул кучченеçĕ
Çав «Хĕл Мучирен»
Ирччен асаннеçĕм
Хурать ерипен.
Анне ĕненмешкĕн
Сĕнет пурпĕрех:
– Пире тĕлĕнтермĕш
Кирлех, – тет, – кирлех.
Ан тив, шанчăк ырă,
Чипер пирĕшти
Пекех çумăн пытăр
Ваттин те вĕттин.
Пĕччен питĕ йывăр
Пире тĕнчере.
Эппин, шанчăк упрăр
Ялан чĕрере.