КĂВАЙТ УМĔНЧЕ

Юрӑ пуçлакан:                Ешӗл улӑх йӑлӑмра
                                             Унта кӑвайт чӗртрӗмӗр.
                                             Лагерӗпех пухӑнса,
                                             Вӑй выляма килтӗмӗр.

Хор:                                     Вучӗ çунса тӑнӑ май
                                             Кӑвайт хурсах пырӑпӑр.
                                             Юрлаканӗ юрлӑпӑр,
                                             Ташлаканӗ ташлӑпӑр.

Пӗрремӗш ушкӑн:       Туслӑ-çке ялан эпир,
                                            Выля, савӑн, шкул ачи!
                                            Кам-та пулин пирӗнтен
                                            Савӑнмасӑр юлать-и?

Пурте харӑс,                   Ҫук! Ҫук! Юлас çук!
кӑшкӑрса:                        Юрламасӑр юлас çук!
                                            Лагерьти вӑйӑсене
                                            Хутшӑнмасӑр тӑрас çук.

                                            Ҫук! Ҫук! Юлас çук,
                                            Ӳркенӳллӗ пулас çук.
                                            Эпир вӗренӳре те
                                            Кая юлса пырас çук!

Юрӑ пуçлакан               Хӑйӑр çинче выляма
е 1-мӗш ушкӑн:              Пит килӗшет вӗт-шака.
                                            Ҫутӑ хӗвел, ӑш хӗвел
                                            Ҫирӗплетет шӑм-шака.

2 мӗш ушкӑн:                 Вӑрманӗ те утӑмрах,
                                            Улӑхӗ те умӑнтах.
                                            Ушкӑнӗпех тухрӑмӑр,
                                            Ҫырла, чӗчӗк пухрӑмӑр.

Пурте харӑс,                    – Шарт! Шарт! алӑ çуп! –
алӑ çупса:                        Сӑвӑ калать Элеçук.
                                            Ун пек шеп те калакан
                                            Лагӗрӗпе пӗри çук.
                                                                       (Сӑвӑ.)

                                             – Хур! Хур! Кӑвайт хур!
                                            Пирӗн ташӑ ӑсти пур.
                                            Пӗрре çеç-и? – Вуннӑ та…
                                            Вуннӑшӗ те пит маттур.
                                                                       (Ташӑ.)

1-мӗш ушкӑн:                  – Хур! Хур! Кӑвайт хур!
                                            Пул хастар эс, пионер!
                                            Халӗ лайӑх канар-та
                                             Хӗлле лайӑх вӗренер.

Пурте пӗрле,                 Тавах тӑван çӗршыва
хастаррӑн:                      Пире ырлӑх панӑшӑн!
                                           Тавах тӑван партие
                                           Тулӑх, савӑк пурнӑçшӑн!