Чуччу
Сарине Лидия Михайловна
Чуччу ларкăчĕ пушах,
Такама кĕтет.
Маншăн тунсăхлать пулас,
– Ярăнма кил! – тет.
Пукане йĕре-йĕре
Тăчĕ ир-ирех.
Кушакки манпа пĕрле
Утрĕ чиперех.
Хăрамаççĕ куçăмсем,
Ярнăпăр пĕрле.
– Лайăх ларăр, тусăмсем! –
Кăшкăртăм пĕррех.
Кушак çури шикленет,
Мăч хупать куçне.
Пукани те тĕлĕнет,
Ялт çĕклет пуçне.
Кушак тарчĕ ман çумран,
Эх, хавшак чĕре!
Пукане юлмасть унран,
Ӳкрĕ ав çĕре.