АСАТТЕ ЯЛĔНЧЕ

Сялгусь Петр Николаевич

Тупмалли

Б. Тихонов.	Асатте ялне кайсан
П. Çăлкуç.	Çуркунне Вăтанчăк автан Çуркунне юрри Хур аçи
Б. Тихонов.	Чакак
	Шимппи-шимппи чăх чĕппи
	Кăвакал
	Шăнкăрч
	Чĕкеç
П. Çăлкуç.	Кушакпа шăши
Б. Тихонов.	Кушак
	Кушака вăрçас килет
	Йытă çури
П. Çăлкуç.	Качака
П. Çăлкуç.	Утмăл турат
Б. Тихонов.	Йĕп вăрри
Б. Тихонов.	Тĕкĕлтура
П.Çăлкуç.	Кăткă
	Ĕмĕт
	Лавçăсем
Б. Тихонов.	Ват çынна пулăшмалла
П. Çăлкуç.	Парне
П. Çăлкуç.	Хурăн
Б. Тихонов.	Куршанак
	Чие
	Шурă хурлăхан
	Мулкач
	Чĕрĕп
	Хурăна хуçасшăн тăвăл
	Аслати
П. Çăлкуç.	Çумăр умĕн
П. Çăлкуç.	Çумăр
Б. Тихонов.	Кăмпара
Б. Тихонов.	Мĕн-ши вăл çĕмел?
П. Çăлкуç.	Хама çеç, тен, хăналас?
Б. Тихонов.	Пултарать çав
	Хветура
	Кĕтÿре
	Çур аки
П. Çăлкуç.	Асанне е кукамай
Б. Тихонов.	Çÿпçе
Б. Тихонов.	Иксĕмĕр юрлар-и, асанне!
П. Çăлкуç.	Чуччу
	Кĕр кунĕ
	Шкула
Б. Тихонов.	Ик чĕлхе вăл ик тĕнче
П. Çăлкуç.	Сăмах вăййи
	Пулмасла ÿкерчĕксем
	Тупсăмне туп
	Тата тăххăр пур
	Пÿрнеске
	Буратино йыхравĕ
	Пукане
	Каçхине
	Хĕл илемĕ
	Çывăр, уйăх
	Ут
	Хĕл Мучи килет
Б. Тихонов.	Кам мĕн сутрĕ?
Б. Тихонов.	Тĕрĕ
П. Çăлкуç.	Хĕл Мучи юрри
Б. Тихонов.	Менелник
П. Çăлкуç.	Чун уççи
П. Çăлкуç.	Ачалăх
Б. Тихонов.	Ан хăрат, пакша
П. Çăлкуç.	Парнеле çĕн телей.

ÇУРКУННЕ

Килчĕ, çитрĕ çуркунне

Ашă-ăшă кăнтăртан.

Хăйĕн пĕтĕм çутине

Пачĕ валеçсе чунтан.

Çут тумла юрла-юрла

Шăтарать сив хĕл тумне.

Çерçисем тăнла-тăнла

Тасатаççĕ çунатне.

Улшăнать майĕпенех

Шурă çĕлĕклĕ тĕнче.

Çуркунне! Килех, килех!

Эсĕ пирĕн чунсенче.

Сапнă май ĕлккен шевле,

Хĕрÿрех пăхать хĕвел.

Шел-ши, тусăмсем, хĕле?

Тен, кăштах, чăнах та, ше;

Пурпĕр кăмăлăм аван,

Хыттăнрах тапать чĕре:

Пин те пĕр хавас самант

Малашне кĕтет пире.

Кунсерен илемлĕрех

Курăнать чăпар тĕнче.

Çуркунне! Килех, килех!

Эсĕ пирĕн чунсенче.

ВĂТАНЧĂК АВТАН

Сар автан-куккареккук

Авăтма пĕлет ăста.

Ун пекки халь урăх çук

Чаплă юрăçă ниçта.

Уçă, шухă сассипе

Вăратать яла куллен,

Вăхăта чухлассипе

Ирттерет-тĕр сехетрен

Анчах темĕншĕн манна

Вăл çилленнĕ пулмалла:

Вăратма ялан манать

Е манран пит вăтанать?

Çывăратăп тепĕр чух

Эпĕ кăнтăрлачченех:

Сар сăмса-куккареккук

Мăшкăллать çав териех.

Ак паян картишĕнче

Эп ятлатăп автана:

— Мĕншĕн,— тетĕп,— ир çинче

Вăратмастăн эс мана?

Вăл йĕплет: «Ăш вырăнна

Эс ытла та юратан,

Çавăнпа-çке вăрăма

Тăсăлать ыйху та сан».

Ячĕ мар-и шухăша

Сăмахху сан, сар автан.

Эп тÿрлетĕп йăнăша-

Эсĕ çеç тек ан вăтан

ХУР АÇИ

Шурă хура хур аçи,

Йышлă çемйин хуралçи,

Шав хăрах ури çинче

Вăл тăрать картишĕнче.

Хур аçи, хăрах уран,

Тен, аманнипе тăран?

Еплерех сана сиплес?

Тухтăра, тен, чĕнтерес?

Ка-ка-как,— сас пачĕ хур.-

Сып-сывах эп, акă, кур:

Ик ури те манăн пур,

Пултарап утма маттур!

Санăн ыйтăвна вара

Хуравлатăп çапларах:

Çĕре йывăр пуласран

Эп тăрап хăрах уран.