Çĕнĕ ҫĕлĕк

Шур сухаллӑ, витӗр куҫлӑ Ухтиван

Чӗрӗ тилӗ тытса пынӑ вӑрмантан.

 

Карчӑкне парать вӑл кивӗ ҫӗлӗкне:

- Пер вута, - тет, - эп ҫӗлетӗп ҫӗннине.

 

Мулаххай тем самантрах каять ҫунса.

Шурсухал ларать мӑн ҫӗҫӗ хӑйраса.

 

Ну, тӑванӑм, - тет вӑл пӑшӑлккӑ тилле,-

Ташша яр та пирӗн кӑмӑла ҫӗкле.

 

Тилӗ-тус ҫап ҫут ҫӗҫҫе пӑхса илет -

Чунӗ кӗрхи ҫулҫӑ пек тӑр-тӑр чӗтрет.

 

Кантӑкран кӑчӑк туртать ӑна вӑрман,

Ах, епле-ши хӑтӑлас ку тамӑкран?

 

Шурсухалӗ ал ҫупмашкӑн пикенет:

- Ну, ташла, сан пурӑнас куну иртет.

 

- Ташласса ташлап-ха, - тет ӑна тилли, -

Кӗпе кирлӗччӗ эрешлӗ-тӗрӗлли...

 

Карчӑк васкасах уҫать хӑй арчине,

Шыраса тупать чи капӑр кӗпине.

 

- Ай, кӗпи, - тет тилӗ, - чӑн та лайӑх ку,

Пуҫӑма валли параймӑр-ши хушпу?

 

Хушпуне те пачӗ карчӑк хайхискер.

Пурпӗрех-ха тилӗ ташламасть темскер.

 

- Кӗвӗ май, - тет, - савӑнса сулкалама

Кӗмӗл сулӑ кирлӗ икӗ аллӑма.

 

Мӑшӑр сулӑ тӑхӑнсан кил хуҫине

Вӑл каларӗ: - Ну, янрат-ха кӗслўне...

 

Тытрӗ ватӑ тӗнкӗл-тӗнкӗл кӗслине,

Шӑрантарчӗ чи юратнӑ кӗввине.

 

Капӑр тилӗ пӗрре юхрӗ юхӑм пек,

Хӗрнӗҫемӗн хӗрсе кайрӗ ҫиҫӗм пек.

 

Шурсухалӑн чунӗ ҫу пек ирӗлет,

Карчӑкки те ташламашкӑн пикенет.

 

- Ах, уҫсамӑр, - тет тилли, - чўречӗре,

Пӑчӑпа кӗҫ чарӑнса ларать чӗрем...

Ватӑ карчӑк кантӑка уҫса ярать -

Чее тилӗ вӑшт кӑна тухса тарать.

 

...Кивӗ ҫӗлӗк ҫунса кайнӑ паҫӑрах,

Ҫӗнӗ ҫӗлӗк - вӑрманти сӗм чӑтлӑхра.