Материал представлен из коллекции электронной библиотеки «Писатели Чувашии – детям» – pchd21.ru
Электронная библиотека создана Чувашской республиканской детско-юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства

Автор:   Зотова Галина Вячеславовна
Книга:   Ылтăнту
Сказка: Капăр канфет

Пĕр лавккара çăкăр, пĕремĕк тата канфет тĕл пулчĕç тет.
– Эпĕ пуринчен те чиперри, – мухтанать канфет. – Пăхăр-ха ман çине, епле хитре ман кĕпе, йăлтăр-ялтăр çиçсе çеç тăрать. Эпĕ тата пуринчен те тутли! – тет. 
– Эпĕ те тутлă, – сăмах хушмасăр чăтаймасть тет çăкăр. – Мана тин çеç кăмакаран пĕçерсе кăларнă.
– Эпĕ те тутлă, – тет пĕремĕк те.
– Эпĕ пур пĕр кунта чи тутли, чи чиперри те чи хакли!.. – хăйĕннех перет канфет.
Çапла чылай тавлашаççĕ вĕсем, вĕçне-хĕрне тухаймаççĕ.
Ирхине лавккана пĕр кинемей килсе çăкăр туянчĕ тет.
– Куртăн-и, – тĕксе илчĕ тет çăкăр пылак çимĕçе, – эпĕ пуринчен те тутлăрах пултăм, çавăнпа илчĕ те мана кинемей, – терĕ тет.
Кăшт тăрсан лавккана хĕр ача кĕчĕ тет те:
– Мана кукамай пĕремĕк илсе килме хушрĕ, – тесе пĕр хутаç пĕремĕк туянса кайрĕ тет.
– Эпĕ те санран тутлă пултăм, – тесе кӳрентерсе хăварчĕ тет пĕремĕк канфета.
Канфет вара:
– Нимĕн те ăнланаймастăп, эпĕ кунта чи чиперри, чи пылакки те чи тутли. Çитменнине тата, чи хакли, çапах мана туянакан çук, – тесе тĕлĕнет тет.
Выртать-выртать тет çапла канфет лавккара, хăйне хаклăран çынсем туянма пултарайманнине ниепле те ăнланаймасть тет.


Все тексты взяты из открытых источников и выложены на сайте для не коммерческого использования. 
Все права на тексты принадлежат только их правообладателям.