Материал представлен из коллекции электронной библиотеки «Писатели Чувашии – детям» – pchd21.ru
Электронная библиотека создана Чувашской республиканской детско-юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства

Автор: Сарби (Бородкина-Яковлева) Раиса Васильевна
Книга: Хĕвел мулкачĕсем
Стих:  Сайккапа суйкка

Йӑкӑлт-якӑлт! Йӑкӑлт-якӑлт!
Сикрӗ, сикрӗ, сикрӗ Сайкка.
Йӗчӗ, йӗчӗ, йӗчӗ Суйкка:
– Ай! Сикет кӗпер ҫине,
Тарӗ кеҫ вӑрман хыҫне!..

Йӑкӑлт- якӑлт! Йӑкӑлт-якӑлт!
– Эпӗ сан теттў-ҫке, Суйкка, –
Тет ӑна мулкачӗ Сайкка, –
Сикмӗп эп кӗпер ҫине,
Тармӑп эп вӑрман хыҫне.

Йӑкӑлт-якӑлт! Йӑкӑлт-якӑлт!
Сикрӗ, сикрӗ, сикрӗ Сайкка –
Ыр сӑмах итлет, ав, Суйкка:
– Пулӑп эп ялан санпа,
Эп санпа - хавас сӑнпа!

Йӑкӑлт-якӑлт! Йӑкӑлт-якӑлт!
Санпала пӗрле сикетпӗр,
Юханшыв патне ҫитетпӗр,
Сикӗпӗр кӗпер ҫине,
Тарӑпӑр вӑрман хыҫне!

Йӑкӑлт-якӑлт! Йӑкӑлт-якӑлт!
Сикрӗ Сайкка, сикрӗ Суйкка,
Сикрӗҫ, сикрӗҫ, сикрӗҫ ҫуйкӑн!
Сикӗҫ, ак, кӗпер ҫине,
Тарӗҫ сӗм вӑрман хыҫне.

Йӑкӑлт-якӑлт! Йӑкӑлт-якӑлт!
Çитрӗҫ, ак, кӗпер патне,
Ситрӗҫ, ак, вӑрман патне...
Сикӗҫ кеҫ кӗпер хыҫне,
Сикӗҫ, ак, вӑрман хыҫне...

Йӑкӑлт-якӑлт! Йӑкӑлт-якӑлт!
Малалла... Аннесӗр шиклӗ...
Сӗм вӑрман - кашкӑр хушиклӗ...
Суйкка Сайккана каларӗ:
– Каялла сиккелер мар-и?..

Йӑкӑлт-якӑлт! Йӑкӑлт-якӑлт!
Сиккелер анне патне.
Харсӑр, вӑйла ҫын анне.
Калӑпӑр ӑна ҫапла:
– Пит хаваслӑ санпала!

Йӑкӑлт- якӑлт! Йӑкӑлт- якӑлт!
Сиккелерӗмӗр хӗмпе!
Кашт ҫўре-ха пирӗнпе!
Сиккелер кӗпер патне,
Сиккелер вӑрман патне!

Йӑкӑлт-якӑлт! Йӑкӑлт-якӑлт!
Сайккана йӑл кулчӗ амӑш,
Суйккана куҫ хӗсрӗ амӑш,
Сикрӗ вӑшт! кӗпер патне!
Сикрӗ вӑшт! вӑрман патне!

Йӑкӑлт-якӑлт! Йӑкалт-якӑлт!
Сикрӗ, сикрӗ, сикрӗ Суйкка,
Сикрӗ, сикрӗ, сикрӗ Сайкка,
Сикрӗҫ харсӑррӑн вӗсем:
Амӑшпе сикрӗҫ вӗсем,
Сикрӗҫ вӑшт! кӗпер патне:
Сикрӗҫ вӑшт! вӑрман хыҫне!

Йӑкӑлт-якӑлт! Йӑкӑлт-якӑлт!

Все тексты взяты из открытых источников и выложены на сайте для не коммерческого использования. 
Все права на тексты принадлежат только их правообладателям.