Материал представлен из коллекции электронной библиотеки «Писатели Чувашии – детям» – pchd21.ru
Электронная библиотека создана Чувашской республиканской детско–юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства

Автор:   Семендер Юрий Семенович
Книга:   Почему поёт петух = Автан мӗншӗн авӑтать
Стихотворение: Çĕнĕ çĕлĕк

Шур сухаллӑ, витӗр куçлӑ Ухтиван
Чӗрӗ тилӗ тытса пынӑ вӑрмантан.

Карчӑкне парать вӑл кивӗ çӗлӗкне:
– Пер вута, – тет, – эп çӗлетӗп çӗннине.

Мулаххай тем самантрах каять çунса.
Шурсухал ларать мӑн çӗçӗ хӑйраса.

Ну, тӑванӑм, – тет вӑл пӑшӑлккӑ тилле, –
Ташша яр та пирӗн кӑмӑла çӗкле.

Тилӗ-тус çап çут çӗççе пӑхса илет –
Чунӗ кӗрхи çулçӑ пек тӑр-тӑр чӗтрет.

Кантӑкран кӑчӑк туртать ӑна вӑрман,
Ах, епле-ши хӑтӑлас ку тамӑкран?

Шурсухалӗ ал çупмашкӑн пикенет:
– Ну, ташла, сан пурӑнас куну иртет.

– Ташласса ташлап-ха, – тет ӑна тилли, –
Кӗпе кирлӗччӗ эрешлӗ-тӗрӗлли...

Карчӑк васкасах уçать хӑй арчине,
Шыраса тупать чи капӑр кӗпине.
-
– Ай, кӗпи, – тет тилӗ, – чӑн та лайӑх ку,
Пуçӑма валли параймӑр-ши хушпу?

Хушпуне те пачӗ карчӑк хайхискер.
Пурпӗрех-ха тилӗ ташламасть темскер.

– Кӗвӗ май, – тет, – савӑнса сулкалама
Кӗмӗл сулӑ кирлӗ икӗ аллӑма.

Мӑшӑр сулӑ тӑхӑнсан кил хуçине
Вӑл каларӗ: – Ну, янрат–ха кӗслўне...
 
Тытрӗ ватӑ тӗнкӗл-тӗнкӗл кӗслине,
Шӑрантарчӗ чи юратнӑ кӗввине.

Капӑр тилӗ пӗрре юхрӗ юхӑм пек,
Хӗрнӗçемӗн хӗрсе кайрӗ çиçӗм пек.

Шурсухалӑн чунӗ çу пек ирӗлет,
Карчӑкки те ташламашкӑн пикенет.

– Ах, уçсамӑр, – тет тилли, – чўречӗре,
Пӑчӑпа кӗç чарӑнса ларать чӗрем...
Ватӑ карчӑк кантӑка уçса ярать –
Чее тилӗ вӑшт кӑна тухса тарать.

...Кивӗ çӗлӗк çунса кайнӑ паçӑрах,
Çӗнӗ çӗлӗк – вӑрманти сӗм чӑтлӑхра.


Все тексты взяты из открытых источников и выложены на сайте для не коммерческого использования. 
Все права на тексты принадлежат только их правообладателям.