Материал представлен из коллекции электронной библиотеки «Писатели Чувашии – детям» – pchd21.ru
Электронная библиотека создана Чувашской республиканской детско–юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства

Автор:   Силэм Юлия Александровна
Книга:   Капелька = Тумлам
Сказка: Тумлам

Пурăннă тет çакă çутă тĕнчере Тумлам. Сеп-сенкер, пысăк-пысăк куçлă. Пўске пек çаврака. Мăтăрт-мăтăрт мăнтăркка. Питĕ илемлĕскер. Пĕррехинче вăл уçăлма тухрĕ.
− Мана пăрахса ан кай, − йăлăнчĕ Çĕр.
− Çук, каятăп. Йăлăхтарчĕ çĕр çинче, терĕ Тумлам.
Йăкăшт ярса пусрĕ малалла. Тўрех Сивĕ килсе çўçентерчĕ.
− Ай! − йăпшăнчĕ Çĕр çумнерех.
− Ан хăра, Тумлам. Эпĕ сана шăнтса пăрлантармастăп, − терĕ Сивĕ.
Тумлам йăкăлт-йăкăлт сиккелерĕ. Тăпăрт-тăпăрт тутарчĕ. Хуçкалансах ташларĕ. Алă çупсах савăнчĕ. Йăлтах ăшша пиçрĕ.
Сасартăк Çил сиксе тухрĕ.
− Ай, вĕçтерсе каять, − хўтлĕх шырарĕ Тумлам.
− Ан хăра манран, − терĕ Çил. − Эпĕ санпа пĕрле вĕçĕп.
Тумлам малалла ыткăнчĕ. Кĕтмен çĕртен Хура Пĕлĕт килсе хурлантарчĕ.
− Ан хăра, Тумлам, − терĕ Пĕлĕт. − Лар ман çине. Чуччу ярăнтарăп.
Лартрĕ те Тумлама хăй çине вăр-вар çаврăнтарчĕ.
Аслати кĕр кĕрлерĕ кĕтмен çĕртен. Хăлтăр-хăлтăр хăлтăртатрĕ. Хăнтăр-хăнтăр тутарчĕ. Шартах сиктерчĕ. Тумлам шикленсех ўкрĕ.
− Ан хăра, Тумлам, − çине-çинех шарт та шарт авăтрĕ Аслати. − Эпĕ сана тĕнче кĕрлевне кăтартăп.
Лартрĕ те Тумлама хăй çине кăр-р кăна кĕрлеттерчĕ.
Сасартăк Çиçĕм çиçрĕ ялтлатса. Тумлам куçне мăч-мăч мăчлаттарчĕ ытла çутă ўкнипе.
− Ан хăра, Тумлам, − терĕ Çиçĕм. − Эпĕ сана Сарă кун çĕршывне илсе çитерĕп.
Çиçсе пыратчĕ хайхи Çиçĕм çиçкĕнлĕхĕпе. Пат! тумларĕ ун çине тепĕр тумлам.
− Ай! − айлатрĕ Тумлам. − ўкетĕп.
− Аван-и! − шавларĕ Çĕнни. − Эс те Тумлам. Эп те Тумлам. Иксĕмĕр пулăпăр пы-ысăк Тумлам, − терĕ те унпа пырса пĕрлешрĕ.
− Эсĕ пысăкланса кайнăçке! − парашютпек вĕçсе анчĕ Тумлам умне Çулçă. − Эпĕ сана хўтлĕх парăп. Симĕс çулçă çине вăшт кăна вырнаçрĕ Тум-лам. Ларчĕ-ларчĕ çапла. Ăна сасартăк тунсăх пусрĕ.
Сивĕ çухалнă. Çил çук. Пĕлĕт пытаннă. Аслати лăпланнă. Çиçĕм çиçмест.
Хăçанччен лармалла-ха çапла çулçă-парашют çинче? Йăкăлт турĕ унталла, мăкăлт турĕ кунталла.
− Кил хам патăма, Тумлам! − хĕрхенчĕ Хĕвел. Вăрăм аллисене тăсрĕ. − Кил, кил, манăн шевлесемпе выляса савăн.
Хĕвел Тумлама хăй патне илчĕ.
− Пăчăхсах вилетĕп вĕт эп сан патăнта! −хурланчĕ Тумлам. − Манăн çĕр çинех каяс килет. Яр мана, тархасшăн.
Хĕвел чармарĕ.
Çав вăхăтра тўпере Асамат Кĕперĕ карăнчĕ.
−Лар ман çине! − чĕнчĕ Тумлама. Çапла каларĕ те ăна хăй çине лартрĕ.
Туххăмрах ярăнтарса çитес çĕре çитерчĕ.
Тумлам урипе çĕр çине ярса пусрĕ. Чупсах каясшăнччĕ. Ĕлкĕреймерĕ. Таçтан пĕтĕрт-пĕтĕрт Тĕтре сикрĕ тухрĕ. Умри çула картларĕ. Куçăм нимĕн те курмасть, − тăп чарăнса тăчĕ Тумлам.
−Ан хурлан. Эпĕ сан йăвуна ăшăтма килтĕм, − йăсăрланчĕ Тĕтре.
Тумлам вăл каясса чăтăмлăн кĕтрĕ. Кĕçех тĕтре сирĕлчĕ. Таврара çутă та ăшă пулса тăчĕ.
Тумлам каллех çĕр çинче сиккелеме пуçларĕ. Вăл питĕ-питĕ хĕпĕртерĕ. Ăна çĕр çин-чех пуринчен те ытларах килĕшрĕ.


Все тексты взяты из открытых источников и выложены на сайте для не коммерческого использования. 
Все права на тексты принадлежат только их правообладателям.