Материал представлен из коллекции электронной библиотеки «Писатели Чувашии – детям» – pchd21.ru.
Электронная библиотека создана Чувашской республиканской детско-юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства.

Автор:   Людмила Николаева
Книга:   Пĕчĕк туссем
Стихотворение: «Паттӑр» Ваҫук

Вӑрманпа пырать Ваҫук,
Уншӑн нимле чару ҫук. 
Ак шӑтарчӗ хурӑна, 
Куҫҫуль тулчӗ сурана.
Амантса вӗренене 
Чӗрсе ҫырчӗ хӑй ятне.
Туратсем ҫине-ҫине 
Йӗрсе ӳкрӗҫ ҫӗр ҫине. 
Чулпа печӗ пакшана, 
Канаймарӗ тӑмана, 
Йӑва вӗҫрӗ ҫӗрелле – 
Тата мӗскер кӗтмелле? 
Пурте тарчӗҫ хӑраса, 
Пурте ларчӗҫ пытанса. 
Ваҫук вара ахӑрать, 
Умра мӗн пур – тустарать. 
Ай тур-тур, ай тур-тур-тур, 
Чӑн-чӑн «паттӑр» – пыр та кур! 
Ҫак мӑшкӑла кам чӑтать? 
Юман чунӗ тӑвӑлать – 
Ҫаклатать вӑл вӗҫкӗне, 
Ҫӗклет ҫӳле – тӳпене. 
Хытӑ-хытӑ чӑмӑртать, 
Чӑмӑртать те ӑс парать:
«Курман кун пекки хальччен, 
Эпир йышлӑ – эс пӗччен. 
Пирӗнпе туслашмасан 
Хӑвшӑн ху пулан тӑшман.
Вӑрманта эсӗ хӑна,
Асӑнта тытсам ҫакна:
Кӑткӑ йӑвине ан ват,
Ҫӗмӗрт чечекне ан тат!
Кӗркунне ырла-ырла
Юратса ҫийӗн ҫырла.
Тӗрлӗ-тӗрлӗ кӑмпасем
Тухӗҫ сан ума хӑйсем.
Кӗсье тулли мӑйӑрпа
Кайӑн тулли кӑмӑлпа...»
Кайран, пит пӗлес килсен,
Ача улшӑнчӗ тӗпрен.
Сирӗн хушӑра, туссем,
Пур-и пуçтах Ваçуксем?
Çак «паттăр» сăвăра çеç юлтăр!
Пур çын вăрман юлташĕ пултăр!


Все тексты взяты из открытых источников и выложены на сайте для не коммерческого использования. 
Все права на тексты принадлежат только их правообладателям.