Материал представлен из коллекции электронной библиотеки «Писатели Чувашии – детям» – pchd21.ru.
Электронная библиотека создана Чувашской республиканской детско-юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства.

Автор:   Лисина Ева Николаевна
Книга:   Улăхпи
Рассказ: Халех каятăп!

Хамăр хула урамĕпе пыраттăм. Ай-ай шăрăх – этем чăтмалла мар! Пурте сулхăна пытанаççĕ. Кур-ха, пĕри вĕтелекен шăрăхран хăрамасăр, ним пулман пек урам варрипе ыткăнса пырать. Ара, Çамрăк Юмахçă-çке ку! (Эсир, тен, юмахçă вăл яланах ватă пулакан тетĕр пулĕ, анчах ватти малтан çамрăк пулать, çавăнпа Çамрăк Юмахçă та пулмалла!)
– Итле-ха, – тетĕп ăна, – шăрăх, сывлама та çук!
– Яла каяс пулать, яла! Эп халь çеç пĕр ялтан килтĕм. Ырлăх унта!
– Ялĕ мĕн ятлăскер?
– Мĕнле пултăр – Улăхкасси!
– Хăш килĕнче чарăнса тăма юрать-ши?
Çамрăк Юмахçă малалла талпăнать, вырăнтан хускалнă трамвая çитсех-çитсех пырать, чупнă май мана ăнлантарать:
– Ан пăшăрхан! Унта сана кĕтсех илеççĕ! Паянах кай!
Мĕнех ара! Эпĕ те килелле чуптартăм: карттă çине пăхас-ха – çавăн пек ял пур-и? Пур, пур ун пекки – ытлашши инçех те мар, питех çывăхах та мар, çитме пулать! Халех каятăп!


Все тексты взяты из открытых источников и выложены на сайте для не коммерческого использования. 
Все права на тексты принадлежат только их правообладателям.