Материал представлен из коллекции электронной библиотеки «Писатели Чувашии – детям» – pchd21.ru
Электронная библиотека создана Чувашской республиканской детско-юношеской библиотекой – www.rdub21.ru – на средства гранта Президента Российской Федерации для поддержки творческих проектов общенационального значения в области культуры и искусства

Автор:         Афанасьев Алексей Андриянович
Книга:         Çунатлă çамрăклăх
Стихотворение: Ан ман, пионер!

Çӳлте-çӳлте,
Пĕр-ик тĕлте,
Куратăп шурă пĕлĕте:
Пĕри – тĕве, тепри – путек –
Тăраççĕ хытнă кăпăк пек.

Анкартинче шавла-шавла
Эпир вылятпăр вăрçăлла.
Ваçук – Чапай,
Ванюк – салтак,
Урапаран тăватпăр танк.

Лаша утланнисем – хĕçпе
Çӳреççĕ шавлă, сиккипе.
Пуç тăрринче вĕсен хупах,
Будённăй çĕлĕкĕ майлах.

Çав вăхăтра йĕтем енчен
Атте пире чĕнет иккен.
Кĕç çуйхашу лăпланчĕ те,
Мăн сассипе калать атте:

– Эсир вылятăр вăрçăлла.
Вăййи вăл лайăх япала...
Анчах пĕлет-и-ха Ваçук –
Кунта кĕрленĕ çапăçу. –

Тăпраллă шĕвĕр япала
Атте кăларчĕ пахчаран:
– Хăйăрпала тасатмалла.
Ан лартăр ун çине тусан.
Чăн-чăн винтовка штыкĕ çак.
Унпа çӳренĕ-çке салтак!

Тасатрăмăр эпир штыка.
Вăл пулчĕ çивĕч, йăлтăркка!
Илсе çитертĕмĕр шкула,
Вара шутларăмăр çапла:

Ваттисенчен ыйта-ыйта
Çав çапăçу çинчен пĕлер
Вут-хĕмлĕ иртнĕ вăхăта
Ан мантăр çамрăк пионер!


Все тексты взяты из открытых источников и выложены на сайте для не коммерческого использования.
Все права на тексты принадлежат только их правообладателям.